Steig ofan í hver þegar unnustunni var bjargað

Rétt eftir hádegi á laugardag barst lögreglunni á Selfossi hjálparbeiðni vegna konu sem talin var fótbrotin í Klambragili sem er norðvestur af Hveragerði.

Um par var að ræða sem hafði verið á göngu er konan missteig sig og fótbrotnaði. Björgunarsveitir frá Hveragerði, Selfossi og Þorlákshöfn voru kallaðar út til aðstoðar.

Björgunarsveitarmenn gengu með konuna uppúr gilinu að Bitru þar sem aðrir björgunarsveitarmenn tóku við og komu konunni til byggða.

Svo óheppilega vildi þó til á leiðinni að samferðamaður konunnar steig niður í hveravilpu og brenndist á fæti og hlaut annars stigs bruna.