Gylfi: Einokun á mjólkurmarkaði skelfileg

Viðskipta- og efnahagsráðherra segir skelfilegt að einokun ríki nú á mjólkurmarkaði. Búvörusamningur gengur framar samkeppnislögum og Samkeppniseftirlitið getur ekki komið í veg fyrir samruna Mjólku, sem hefur verið sjálfstæður framleiðandi, og Kaupfélags Skagfirðinga.

Mjólka, sem hefur verið sjálfstætt félag á mjólkurmarkaði, hefur glímt við rekstrarvanda. Félagið hefur nú runnið inn í Kaupfélag Skagfirðinga. Samkeppniseftirlitið getur ekki komið í veg fyrir samrunann, enda þótt hann teljist samkeppnishamlandi. Það skýrist af því að búvörulög ganga samkeppnislögum framar.

Gylfa Magnússyni, viðskipta- og efnahagsráðherra, líst illa á þetta. Mjólkurvörur séu fimmtungur af matarútgjöldum heimilanna og samkeppnin hafi bæði komið bændum og neytendum vel.

„Það er skelfileg tilhugsun ef að út úr því ferli öllu saman kemur í einhverjum tilfellum að keppinautar renna saman þannig að samkeppni minnkar. Í þessu tilfelli minnkar ekki bara samkeppnin heldur hverfur hún alveg því Mjólka er eini sjálfstæði aðilinn á þessum markaði," segir Gylfi.