Fordæma samning OR um sölu á hlutnum í HS Orku

Borgarahreyfingin lýsir furðu sinni og andstyggð á því að sveitarfélög geti tekið sér það gerræðisvald að koma auðlindum þjóðarinnar í hendur einkaaðila án nokkurar lýðræðislegrar umræðu eða þverpólítisks vilja í samfélaginu. Borgarahreyfingin fordæmir það harkalega, að þjóðin sé svipt nýtingarrétt sínum á eigin auðlind í 65 ár í allt að 130 ár sem er fordæmislaus árafjöldi sé miðað við vestræn lýðræðisríki á borð við Bandaríkin sem miðar við 10 ár, í skjóli skammtímahagsmuna og einbeitts vilja fulltrúa sveitarfélaganna til að nýta sér tækifæri kreppunar til einkavæðingar án umræðu og umboðs.

Þetta kemur fram í ályktun frá félagsfundi Borgarahreyfingarinnar sem haldinn var í fyrradag. Í ályktuninni segir ennfremur að Borgarahreyfingin fordæmi þann samning sem nú liggur fyrir að eigi að samþykkja hjá Reykjavíkurborg um að koma hlut Orkuveitu Reykjavíkur í HS Orku í hendur einkaaðila með lítilli umræðu og í raun án nokkurs umboðs eða þverpólitísks vilja hins almenna borgara ein og það er orðað.

Þá segir að þegar litið sé yfir samninginn og skarpir menn hafa reiknað út frá uppgefnum forsendum, megi glögglega sjá að Reykvíkingar muni tapa hið minnsta um fimm milljörðum sem samsvari rekstri leikskólakerfisins í hálft ár eða í versta falli 9,4 milljörðum króna.

„Einstaka furðu vekur það svo og er í raun algjörlega óásættanlegt að OR skuli svo veita kúlulán á lægri vöxtum en vel greiðslufær stórveldi fá á sama tíma og OR er að greiða Hafnarfirði verðtryggt lán til baka á 4,5% vöxtum fyrir hlut Hafnarfjarðar í HS Orku. Auk þess sem furðulegt má telja að 100 milljónum sé fleygt í ráðgjafafyrirtæki fyrrum starfsmanna Landsbankans fyrir þessa algjörlega óásættanlega sölu á sama tíma og verið sé að skera niður annars staðar í samfélaginu," segir í ályktuninni.

Fundurinn ályktar því svo að borgarstjórn beri að hafna samningnum sem ekki sé gerður í þágu hins almenna borgara og minnir borgarstjórn á að hún eigi að vera að vinna í þágu almennings en ekki gegn hagsmunum borgarbúa líkt og í þessu máli.

Þá sé svo óafsakanlegt að Orkuveita Reykjavíkur sé að taka veð eingöngu í hlutabréfum HS Orku en ekki í neinum raunverulegum eignum og sé það fordæmt með öllu að slík 2007 bókhaldsveð séu notuð miðað við afleiðingar annarra slíkra fyrir íslenskt samfélag.

„Félagsfundur Borgarahreyfingarinnar ályktar einnig að grípa beri harkalega í taumana og þessi dulbúna tilraun til einkavæðingar á auðlindum þjóðarinna með yfirskini nýtingarréttar, verði tafarlaust stövðuð með öllum tiltækum ráðum svo sem inngripi skilanefnda og þjóðnýtingar fyrirtækjanna sem um ræðir ef þörf krefur. Að lokum vill Borgarahreyfingin hvetja alla þá sem ekki stendur á sama, óháð skoðunum, til að senda borgarfulltrúum bréf og tölvupósta eða hringja til að lýsa vanþóknun sinni yfir. Einnig hvetur hún alla þá sem vettlingi valda til að fjölmenna á borgarráðsfund næstkomandi fimmtudag til að sýna óánægju sína í verki."