Flest allir hestarnir tryggðir

„Flest allir hestarnir voru tryggðir held ég," segir Rúnar Þór Guðbrandsson, deildarstjóri einstaklingsviðskipta hjá VÍS en hann var á vettvangi þegar um tíu hestar fóru ofan í Reykjavíkurtjörn eftir að ís gaf sig.

Ástæðan fyrir því að hestarnir voru á Tjörninni var kynning á meistaradeildinni í hestaíþróttum sem er kostuð af VÍS. Kynningin sjálf fór fram í Ráðhúsinu en síðan átti henni að ljúka með glæsilegri hestasýningu.

„Sýningin var að líða undir lok þegar knaparnir ákváðu að enda með glæsibrag," segir Rúnar en þá töltu hestarnir í breiðfylkingu yfir ísinn, sem varð til þess að hann gaf undan.

Að sögn Rúnar var fólki dálítið brugðið, „en sem betur fer fór þetta vel. Einn knapinn hafði svo á orði að fall væri faraheill" segir Rúnar.

Sjálfur aðstoðaði hann við að koma hestunum úr vökinni en Rúnar stundar hestaíþrótti af kappi auk þess sem hann starfar hjá VÍS. Spurður hvort hestarnir hafi ekki allir verið tryggðir segist hann ekki alveg viss um það, hann bjóst þó frekar við því.

Engum varð meint af volkinu, hvorki dýrum né mönnum.