Hýrudreginn fyrir bleikt bindi á brjóstakrabbadag

Strætisvagnabílstjóri í Illinois í Bandaríkjunum hefur verið hýrudreginn fyrir að setja upp bleikt bindi á degi bleiku slaufunnar sem í Bandaríkjunum er fyrsti föstudagur í október.

Hinn 46 ára gamli William Jones sagði fréttamönnum að bæði amma hans og systir hefðu þurft að glíma við brjóstakrabba og hann hefði sett upp bleika bindið fyrir þær.

Yfirmönnum fyrirtækisins þótti þetta ekki nógu góð ástæða. Þeir bentu á að fyrirtækið sjái ökumönnum sínum fyrir einkennisbúningi, þar á meðal bindi. Þeir hafi engan rétt til þess að breyta samsetningu búningsins nema hafa fengið leyfi fyrirfram.