Ný sjónvarpsseríafrá Vaktar-mönnum

„Þetta er búið að gerjast lengi, allt frá því að ég kynntist Jóni Gnarr. Þegar við byrjuðum á þessum Vaktar-seríum fóru flestallar kaffipásurnar í sögustund með honum þar sem hann sagði frá hinu daglega lífi inni á geðdeild,“ segir Ragnar Bragason leikstjóri.

Fimmmenningarnir sem hafa verið heilinn og hjartað á bak við hinar geysivinsælu Vaktar-sjónvarpsseríur, þeir Ragnar, Jóhann Ævar Grímsson, Jón Gnarr, Pétur Jóhann og Jörundur Ragnarsson, eru byrjaðir að undirbúa nýja sjónvarpsþáttaröð. Hún mun ekki á neinn hátt hafa tengingu við þá Georg Bjarnfreðarson, Ólaf Ragnar og Daníel heldur er ráðgert að hún gerist að einhverju leyti inni á geðdeild.

Ragnar segir þó að þetta hafi ekki verið rætt af neinni alvöru fyrr en á þessu ári. „Við erum samt búnir að hittast nokkrum sinnum og spá aðeins í persónur og formið.“ Ragnar og félagar hafa náð ótrúlega góðum tökum á sjónvarpsforminu, sem sést kannski best á ótrúlegum vinsældum Vaktar-þáttaraðanna, og Ragnar segir þetta ekki vera neinn flókinn galdur. „Það er hins vegar mjög mikilvægt að skapa bæði trúverðugan og heildstæðan heim. Vaktar-seríurnar gerðust allar inni í mjög lokuðu samfélagi, Næturvaktin á bensínstöð um nótt, Dagvaktin á gistiheimili úti á landi og svo Fangavaktin en sá heimur verður nú varla mikið lokaðri,“ útskýrir Ragnar.

Leikstjórinn upplýsir að í umræðunni sé að þetta verði gert síðla næsta árs og komi þá í sjónvarp árið 2011. „Ef Guð og lukkan leyfir,“ segir Ragnar en óveðursskýin hafa hrannast upp í sjónvarps- og kvikmyndabransanum enda er gert ráð fyrir miklum niðurskurði á starfsemi Kvikmyndamiðstöðvar Íslands sem hefur undanfarið styrkt leikið efni fyrir sjónvarp. Eins og Fréttablaðið greindi frá í síðustu viku gagnrýndi Ragnar ráðamenn þjóðarinnar harðlega á frumsýning Bjarnfreðarson og hann stendur við sérhvert orð. „Við höfum ákveðnum skyldum að gegna við börnin okkar, að þau heyri íslenska tungu og sjái íslenskan hversdagsleika því ekki viljum við ala upp ameríska kynslóð barna,“ segir Ragnar og bætir við að áhorfskannanir sýni það svart á hvítu og að fólk vilji heyra sína tungu og spegla sig í sínum eigin veruleika.

freyrgigja@frettabladid.is