Mikilvægt að verja löggæsluna

„Nauðsynlegt er að fara varlega við fyrirhugaðar breytingar á skipan lögreglumála sem nú eru í undirbúningi," segir Haraldur Johannessen ríkislögreglustjóri. Í inngangi sem Haraldur ritar að ársskýrslu embættisins segir hann að mikilvægt sé að stjórnvöld íhugi vel sérhvert skref sem stigið verður í þeim efnum svo að koma megi í veg fyrir að sú mikla uppbyggingarvinna sem átt hafi sér stað á undanförnum árum fari forgörðum.

Haraldur segir í pistli sínum að reynsla undanfarinna ára sýni ljóslega að veruleikinn breytist dag frá degi. Aldrei hafi verið jafnmikilvægt og nú að verja þá öflugu löggæslu sem lögreglumenn um allt land reyna af fremsta megi að standa vörð um. Framtíðin muni að öðru leyti dæma um hvernig til tekst.

Segir starfsmenn efnahagsbrotadeildar hafa mátt þola níð

Þá segir Haraldur að í kjölfar bankahrunsins hafi vel undirbúnir og þjálfaðir lögreglumenn staðið vaktina svo að aðdáun veki. Á slíkum lögreglumönnum þurfi þeir að halda. „Starfsmenn efnahagsbrotadeildar ríkislögreglustjóra hafa sýnt aðdáunarvert andlegt þrek við rannsóknarstörf sín, m.a. í þeim fyrirferðarmiklu og altöluðu málum sem þeim hafa verið falin til úrlausnar á undanförnum árum. Þeir hafa þolað ómaklegar árásir, persónulegt níð og jafnvel hótanir á opinberum vettvangi án þess að bera hönd fyrir höfuð sér," segir Haraldur.

Löggjöfin dugði ekki til

Hann segir að þegar frá líði og sagan verði skoðuð muni þó enginn efast um að starfsmenn embættisins hafi ætíð unnið í samræmi við gildandi lög og sinnt störfum sínum af fagmennsku og með réttsýni að leiðarljósi. Þó sé ljóst að gera þurfi ýmsar breytingar á löggjöf ef aukinn árangur eigi að nást við sakfellingar í efnahagsbrotamálum. Löggjöf sem ætlað hafi verið að veita viðskiptalífinu aðhald og skýr mörk hafi ekki dugað til samkvæmt niðurstöðum dómstóla.