Markmið Mancini: Topp 4 í vor og vinna titilinn á næsta ári

Roberto Mancini, stjóri Manchester City, kom í gær fram á blaðamannafundi og fór yfir markmið sín sem stjóri liðsins. Mancini tók við liðinu af Mark Hughes sem var rekinn á laugardagskvöldið.

„Markmiðið mitt í dag er að vera meðal fjögurra efstu liðanna í vor," sagði Roberto Mancini og bætti við: „Á næsta tímabili þá ætlum við að vinna titilinn," sagði Mancini sem fær strax mikla pressu á sig enda fékk Hughes aðeins 18 mánuði í starfi og var rekinn þrátt fyrir að tapa aðeins tveimur deildarleikjum á tímabilinu.

„Ég vonast til að vera hérna í mörg ár og vinna marga titla. City á frábæra stuðningsmenn og ég næ vonandi að gera góða hluti fyrir þá," sagði Ítalinn.

Manchester City vonast til að Mancini geti gert sömu hluti og hann gerði hjá Inter. City hefur ekki unnið enska titilinn síðan 1968 en þegar Mancini gerði Inter að meisturum 2006 hafði liðið ekki unnið ítalska titilinn síðan 1989.