Daðrar óstjórnlega

Leikarinn Ryan Phillippe hefur lítið verið í fréttum síðan hann skildi við eiginkonu sína, Óskarsverðlaunahafann Reese Witherspoon. Tímaritið The Enquirer birti nýverið frétt þar sem samband leikarans og kærustu hans, leikkonunnar Abbie Cornish, var sagt standa á brauðfótum.

„Sambandið gengur ekki vel og er það Ryan að kenna. Hann er duglegur að sækja skemmtistaði og reynir við fjöldann allan af stúlkum. Það er næstum eins og Abbie sé ekki til," var haft eftir heimildarmanni. Parið hefur ekki sést saman opinberlega síðan í október og kyndir það enn frekar undir sögusagnirnar. Heimildarmaðurinn sagðist jafnframt vita til þess að Phillippe hefði daðrað ófeiminn við leikkonuna Hayden Panettiere.

„Abbie vissi hvaða orðspor Ryan hafði á sér áður en þau byrjuðu saman en hún trúði því að hann myndi breytast til hins betra," sagði heimildarmaðurinn við tímaritið.