Bjarni vinsælastur meðal sjálfstæðismanna

Meira en helmingur sjálfstæðismanna vilja að Bjarni Benediktsson verði næsti formaður flokksins. 22% þeirra vilja að Þorgerður Katrín Gunnarsdóttir veiti flokknum forystu. Þetta kemur fram í könnun Frjálsrar verslunar fyrir vefsvæðið heimur.is dagana 2. til 4. febrúar. Enn sem komið er hefur Bjarni einn lýst formlega yfir framboði til formanns.

Fólk var spurt hvern viðkomandi vilji sjá sem næsta formann Sjálfstæðisflokksins. Ef aðeins er litið á fylgismenn flokksins nefndu 57% þeirra sem afstöðu tóku Bjarna, 22% Þorgerði, 5% Kristján Þór Júlíusson, 4% Guðlaug Þór Þórðarson og 3% Illuga Gunnarsson.

Þorgerður nýtur stuðnings út fyrir flokkinn

Þegar svör fylgismanna allra flokka eru skoðuð kemur í ljós að forskot Bjarna er mun minna. Um 56% aðspurðra nefndu eitthvert formannsefni. Bjarna nefndu 43% og Þorgerði 37%. Davíð Oddsson, Kristján Þór, Guðlaugur Þór og Illugi fengu allir á milli 2 og 4% stuðning.

Sjálfstæðisflokkurinn stærstur

Stuðningur við Sjálfstæðisflokkinn í könnuninni mælist um 32%. Vinstri græn fengu 24% og Samfylking 23%, Framsóknarflokkurinn 16%, Frjálslyndir 2%. Aðrir fá 2%. Það voru raddir fólksins, Lýðveldisbyltingin og Neyðarstjórn kvenna.

Könnunin gefur ekki ósvipaða niðurstöðu og könnun sem birt var á Stöð 2 fyrr í vikunni. Sjálfstæðismenn fá þó heldur meira fylgi nú en í þeirri könnun og VG og Samfylking heldur minna. Munurinn er innan skekkjumarka.

36% óvissir eða svöruðu ekki

Alls voru 600 spurðir og mikið var um óvissa og þá sem ekki vildu svara. Í könnuninni voru 36% óviss eða vildu ekki svara, Um 6% ætla ekki að kjósa eða skila auðu.