Neyðarkall úr Breiðholti reyndist vera gabb

Neyðarsendir sá sem Landhelgisgæslan hefur leitað að síðan í morgun fannst fyrir stundu. Þyrla Lanhelgisgæslunnar hefur verið á sveimi yfir borginni í dag og leitað að sendinum sem fannst í Breiðholti og var greinilegt að honum hafði verið komið fyrir og hann gangsettur. Gæslan lítur málið mjög alvarlegum augum.

Í tilkynningu frá Landhelgisgæslunni segir að þegar Stjórnstöð Landhelgisgæslunnar barst í morgun tilkynning um að flugvélar í yfirflugi næmu merki frá neyðarsendi var strax farið í að finna út staðsetningu hans. Varðskip og stjórnstöð Landhelgisgæslunnar ásamt björgunarskipi Slysavarnarfélagsins Landsbjargar gátu fljótlega grófreiknað út leitarsvæðið.

„Komust þeir að því að neyðarsendirinn væri í Reykjavík og fundu út í hvaða hverfi borgarinnar sendirinn væri staðsettur. Fór þá þyrla Landhelgisgæslunnar TF-EIR á vettvang sem gat með búnaði sínum minnkað leitarsvæðið talsvert, en ekki nóg, þar sem neyðarsendirinn var staðsettur í íbúabyggð," segir einnig í tilkynningunni.

Þá segir að starfsmenn flugdeildar Landhelgisgæslunnar hafi tekið við leitinni og fóru þeir ásamt sérfræðingi Slysavarnarfélagsins Landsbjargar fóru um leitarsvæðið með handmiðunartæki. Fannst neyðarsendirinn að lokinni þriggja tíma leit.

„Landhelgisgæslan lítur málið mjög alvarlegum augum því tímafrekt er og kostnaðarsamt að setja af stað leit sem þessa auk þess sem verið er að misnota tæki sem annars geta bjargað mannslífum," segir einnig um leið og þeim tilmælum er beint til allra sem endurnýja neyðarsenda í bátum sínum eða flugförum að koma útrunnum neyðarsendum strax til Landhelgisgæslunnar eða til Póst- og fjarskiptastofnunar til að komast megi hjá aðgerðum sem þessum.