Ráðherra sendir út tilmæli vegna fréttar Vísis

Heilbrigðisráðherrann Ögmundur Jónasson, sendi út tilmæli til heilbrigðisstofnanna í gær um að ekki skyldi rukka börn undir átján ára aldri fyrir heilbrigðisþjónustu. Reikningar yrðu héðan í frá stílaðir á forráðamenn.

Ástæðan var frétt sem Vísir.is birti í gær þar sem sagði frá föður þriggja ára gamals drengs sem fékk innheimtuseðla frá heilbrigðisstofnun Suðurlands.

Barnið fékk ítrekun meðal annars upp á þrjúhundruð króna skuld. Samkvæmt lögræðislögum er einstaklingi undir átján ára aldri óheimilt að stofna til skulda.

Þegar rætt var við framkvæmdarstjóra Heilbrigðisstofnunnar Suðurlands, Magnús Skúlason, sagði hann að ástæðan fyrir að rukkunin var á nafni barnsins hafi verið sú að tölvukerfi sem þeir notast við, skrái reikninga sjálfkrafa á sjúklinga sem leita sér aðstoðar. Í framtíðinni verði farið í handvirka leit að forráðamönnum barna sem sækja þjónustu hjá þeim að sögn Magnúsar.

„Þegar þessi frétt vísis birtist í gær þá lét ég strax kanna þessi mál," segir Ögmundur sem lét senda tilmælin til stofnanna á vegum ríkisins í kjölfar birtingar fréttarinnar.