Þriggja ára barn í innheimtu

Þriggja ára gamall drengur búsettur á Eyrabakka hefur fengið senda til sín fimm greiðsluseðla frá heilbrigðisstofnun Suðurlands og þar á meðal innheimtukröfu upp á þrjú hundruð krónur.

Faðir barnsins er ósáttur við rukkunina, sem er á nafni og kennitölu barnsins, og bendir á að börn undir átján ára aldri geti ekki stofnað til skuldar, enda ekki fjárráða.

Samkvæmt lögræðislögum er ekki heimilt fyrir einstaklinga undir átján ára aldri að stofna til skulda.

„Þetta eru ekki háar upphæðir og lítið mál að borga þetta, en til hvers eru þá lögin?" spyr faðirinn og veltir því fyrir sér hvort það sé eðlilegt að rukka drenginn sérstaklega fyrir þjónustuna sem hann fékk hjá heilbrigðisstofnunni. Faðir drengsins telur málið allt hið undarlegasta en í heild hljóðar krafan upp á rúmar 3.200 krónur.

Faðirinn fór í Landsbankann til þess að athuga hvernig stæði á kröfunum og segist hafa talað við starfsmann þar.

„Starfsmaðurinn sagði mér að þetta væri alls ekki einsdæmi, hún sagði mér reyndar líka að ég eigi ekki að borga neina dráttavexti af þessari skuld."

Aðspurður hvort hann hyggist greiða skuldina segist faðirinn ekki viss, það sé verra að fá innheimtu frá lögfræðingi á nafni drengsins í ofan á lagi.

Ekki náðist í framkvæmdarstjóra Heilbrigðisstofnun Suðurlands þegar eftir því var leitað.