Nítján létust í átökunum í höfuðstöðvum pakistanska hersins

Nítján létust í Pakistan í gær eftir að til átaka kom þegar hópur herskárra múslima réðst á höfuðstöðvar hersins í borginni Rawalpindi.

Átökin hófust þegar hópur herskárra múslima, sem talinn er tengjast Talibönum og Al Kaída, kom að höfuðstöðvum hersins í Rawalpindi. Árásarmennirnir voru dulbúnir sem hermenn og freistuðu þess að komast inn í höfuðstöðvarnar. Þegar það tókst ekki braust út skotbardagi með þeim afleiðingum að nokkrir létu lífið.

Árásarmennirnir hörfuðu. En ekki langt, þeir fóru þess í stað inn í nærliggjandi skrifstofubyggingu og tóku þar tæplega 50 gísla.

Nokkrir árásarmannanna klæddust sprengjuvestum og hótuðu að sprengja sig og gíslanna í loft upp. Þegar líða fór á kvöldið lét sérsveit pakistanska hersins til skarar skríða. Hún braust inn í húsið þar sem gíslarnir voru geymdir og skutu strax til bana mann sem gætti gíslanna. Sá var íklæddur sprengjuvesti sem minnstu munaði að hann náði að sprengja.

Gíslarnir voru frelsaðir en ekki tókst að yfirbuga allar árásarmennirnir fyrr en undir morgun eða um 22 tímum eftir árás þeirra á herstöðina.

Að minnsta kosti 19 létust. Sex hermenn, tveir sérsveitarmenn, átta árásarmenn og þrír gíslar.

Einn árásarmannanna náðist á lífi en hann er sagður höfuðpaur hópsins og skipuleggjandi árásarinnar.