Einar vill efsta sætið hjá Framsókn

Einar Skúlason skrifstofustjóri þingflokks Framsóknarflokksins ætlar að bjóða sig fram í fyrsta sæti í Reykjavík suður á lista flokksins í komandi kosningum til Alþingis.

Í tilkynningu frá Einari segist hann vilja leggja sitt lóð á vogarskálarnar til þess að halda áfram því breytingarferli sem hafið sé í Framsóknarflokknum og samfélaginu. Hann segir Framsókn gegna mikilvægu hlutverki í að leiða þjóðina út úr þeim erfiðleikum sem við búum við með öfgalausum sjónarmiðum sem byggis á samvinnu, félagshyggju og mannúð.

„Lykilatriði eru atvinna og velferð, að auka atvinnu og byggja á þeim styrkleikum sem við höfum í atvinnulífi þjóðarinnar, auk þess að þétta öryggisnet velferðarkerfisins til að tryggja að grunnþörfum allra sé mætt," segir Einar.

Hann er 37 ára gamall, þriggja barna faðir, með BA gráðu í stjórnmálafræði frá Háskóla Íslands og MBA gráðu frá Háskólanum í Edinborg.

Hann mun taka launalaust leyfi frá störfum skrifstofustjóra frá og með deginum í dag, þangað til íljós kemur hvernig efstu sæti listans verða skipuð.

Einar starfaði áður sem framkvæmdastjóri Alþjóðahússins um fimm og hálfs árs skeið, en hann hefur verið félagi í Framsóknarflokknum í 13 ár og sinnt margs konar trúnaðarstörfum, var m.a. formaður Sambands ungra framsóknarmanna í þrjú ár. Þá sat hann í Stúdentaráði H.Í. fyrir Röskvu og var framkvæmdastjóri ráðsins 1996-97.