Segist engin augljós mistök hafa gert

Geir Haarde, fyrrverandi forsætisráðherra, fékk á sig erfiðar spurningar þegar hann mætti í viðtal í þættinum HARDtalk á bresku sjónvarpsstöðinni BBC í gær.

Spyrjandinn, Stephen Sackur, krafðist skýrra svara um það hvort Geir væri reiðubúinn til þess að biðja þjóð sína afsökunar á mistökum sem hann hafði gert, bæði sem fjármálaráðherra til margra ára og síðast forsætisráðherra.

„Ég tel ekki að nein augljós mistök hafi verið gerð,“ sagði Geir og reyndi að verjast. „Þetta var röð atburða, þróun sem átti sér stað stig af stigi, og ef þú vilt fara út í að leita sökudólgs, þá þurfa ansi margir að deila þeirri sök með mér.“

Sackur ítrekaði spurninguna hvað eftir annað, en Geir vísaði jafnan til þess að fyrst yrði rannsóknarnefndin, sem á að skila af sér niðurstöðum í nóvember, að hafa lokið rannsókn sinni á því sem gerðist og hvað fór úrskeiðis í aðdraganda bankahrunsins.

„Ég tek á mig minn hluta af ábyrgðinni þegar þetta er komið í ljós og í öllu falli mun ég ekki gera það í sjónvarpsþætti á BBC, þú fyrirgefur,“ sagði Geir.

Geir vildi ekki heldur staðfesta það hvort Davíð Oddsson seðlabankastjóri hefði ítrekað varað hann við hruni íslenska fjármálakerfisins.

„Ég ætla ekki að segja þér hvað fór okkar á milli í einkasamræðum,“ sagði Geir. „Allt þetta kemur í ljós þegar rannsókninni er lokið.“

„Þetta snýst býst ég við um að sýna forystu,“ sagði þá spyrjandinn. „Fólk vildi sjá þig sýna raunverulega forystu, en það sá það ekki, er það nokkuð?

„Það er ekki mitt að meta það, herra minn,“ svaraði þá Geir.Geir ítrekar í viðtalinu ásakanir sínar á hendur Gordon Brown, sem setti hryðjverkalög fyrst á íslenska ríkið og síðan Landsbankann: „Það sem gerðist í byrjun október af hálfu breska ríkisins var að mínu mati algerlega óafsakanlegt, ónauðsynlegt með öllu og án minnstu viðvörunar.“

Sacker spyr þá hvort Geir hafi sagt þetta við Brown, en Geir segist ekki hafa rætt við hann eftir þetta.

„Hvers vegna ekki?“ spyr þá Sacker. „Hvers vegna settirðu þig ekki strax í samband við hann og sagðir honum þitt álit?“

„Ja, ég hefði kannski átt að gera það,“ svaraði þá Geir.

gudsteinn@frettabladid.is