Katrín til Húsavíkur með nýtt plagg

Þegar iðnaðarráðherrann rennur inn í bæinn með nýju pappírana verða liðnar þrjár vikur frá því fyrri viljayfirlýsing með aðild Alcoa rann út. Nýja plaggið verður um nýtingu orkunnar í Þingeyjarsýslum en nú fá bara sveitarfélögin að vera með, Norðurþing, Þingeyjarsveit og Skútustaðahreppur.

Bergur Elías Ágústsson, sveitarstjóri Norðurþings, segist trúa því að málið muni nú fara í góðan farveg. Áfram verði unnið með Alcoa, eins og verið hafi síðustu þrjú árin, en samhliða muni menn skoða aðra kosti, ef þeir verða fyrir hendi.

Þótt ríkisstjórnin vilji ekki skrifa upp á með Alcoa segir Bergur Elías að sveitarfélagið muni væntalega gera það. Og hvað sem ríkisstjórninni finnst þá verður undirritunin á fimmtudag til þess að Þingeyingar keyra áfram undirbúning álvers Alcoa á Bakka af ekki minni ákefð en áður.

Bergur Elías vonast til að hægt verði að ganga til samninga við Alcoa haustið 2010 og hafist verði handa af fullum krafti í beinu framhaldi. Framkvæmdir við álver hefjist þannig árið 2011. Fyrst þurfi að fara í rannsóknir sem taki ákveðinn tíma og séu mannskapskrefjandi en það fari allt á fulla ferð.