Átján mánuðir fyrir að gefa barni sígarettu

Þrítugur breskur maður var í dag dæmdur í átján mánaða fangelsi fyrir að gefa þriggja ára stúlkubarni sígaréttur og hvetja hana til þess að taka reykinn ofan í sig. Hann fékk svo fjórtán ára gamla telpu til þess að taka myndir af þessu á farsíma sinn.

Á myndbandi símans má heyra manninn hlæja og einhver segir; -Hún reykir hana alla sjálf. Alls reykti barnið þrjár sígarettur. Sextán ára stúlku sem var viðstödd fannst þetta ekkert fyndið og hún tilkynnti málið til lögreglunnar.

Við dómsuppkvaðningu í dag sagði dómarinn við manninn; -Þér fannst víst fyndið að leyfa barninu að reykja sígarettu og láta taka myndir af því. Ég býst við að þú gerir þér grein fyrir því núna að það var alls ekkert fyndið við þetta.