Eiríkur í Austurbæ

Miðasala á afmælistónleika Eiríks Haukssonar hefst á fimmtudaginn á vefsíðunni midi.is klukkan 11. Eins og Fréttablaðið greindi frá fyrir margt löngu verður Eiríkur fimmtugur í ár en engin ellimerki eru þó á rauðhærða rokkaranum. Hann blæs til veglegrar afmælisveislu eins og honum einum er lagið og hyggst sýna og sanna, í eitt skipti fyrir öll, að allt er fimmtugum fært. Tónleikarnir verða á afmælisdaginn sjálfan sem er 4. júlí og hefur þeim verið gefið nafn við hæfi: „Born on the fourth of July“.

Eiríkur mun að sjálfsögðu taka alla sína helstu slagara en sérstök afmælissveit hefur verið sett saman til að leika undir. Að sjálfsögðu munu íslenskir tónlistarmenn heiðra Eirík með nærveru sinni en jafnframt hafa nokkrir erlendir samstarfsmenn Eurovision-stjörnunnar boðað komu sína, þeirra á meðal Ken Hensley, fyrrverandi liðsmaður Uriah Heep.