Verðandi prestur bæjarstjóri næstu mánuði

Jóna Kristín Þorvaldsdóttir, sem er nýráðinn sóknarprestur við Kolfreyjuprestakall í Austfjarðarprófastsdæmir, mun sinna störfum sem bæjarstjóri Grindavíkur næstu tvo til þrjá mánuði. Þetta kemur fram í yfirlýsingu frá meirihluta bæjarstjórnar Grindavíkur.

Tilkynningin er svohljóðandi:

Meirihluti B, S og V lista í Grindavík vill koma eftirfarandi tilkynningu á framfæri, þar sem bæjarstjóri, Jóna Kristín Þorvaldsdóttir, hefur verið ráðin í embætti sóknarprests við Kolfreyjustaðarprestakall í Austfjarðarprófastsdæmi:

Jóna Kristín mun sinna störfum bæjarstjóra næstu tvo til þrjá mánuðina. Á næstu vikum verður skýrt frá því hvernig farið verður með yfirstjórn á bænum þá mánuði sem eftir eru af kjörtímabilinu.

Meirihlutinn hefur staðið þétt saman í veigamiklum hagsmunamálum fyrir Grindavík, er snúa að Hitaveitunni og landakaupum, og mun einbeita sér að því að leiða þau mál til lyktar til farsældar fyrir framtíð Grindvíkinga.