Nauðgari krafinn um milljónatugi

Eitt fórnarlamba nauðg­arans Jóns Péturssonar hefur krafið hann um rúmlega tuttugu milljónir í skaðabætur fyrir hönd ólögráða sonar síns. Bótakrafan er til komin vegna andlegs skaða sem pilturinn varð fyrir þegar hann horfði upp á ofbeldi Jóns gegn móður hans. Pilturinn er metinn með 25 prósenta örorku vegna þess andlega áfalls sem hann varð fyrir.

Jón hefur í tvígang hlotið fimm ára fangelsi fyrir hrottafengið ofbeldi gegn þremur konum. Fyrst hlaut hann dóm í október 2006 fyrir ofbeldi gegn tveimur konum. Annarri þeirra misþyrmdi hann í tvígang, sló hana margsinnis og sparkaði í hana og ruddist síðar inn í íbúð hennar, barði hana og dró hana um á hárinu að syni hennar sjáandi. Þá var hann einnig dæmdur fyrir að halda fyrrverandi unnustu sinni fanginni í átta tíma, misþyrma henni hrottalega og nauðga henni í þrígang.

Seinni dóminn hlaut hann fyrir að halda þáverandi sambýliskonu sinni nauðugri í íbúð þeirra í hátt í sólarhring, berja hana stöðugt, nauðga henni og ógna og lemja með eggvopnum.

Ein kvennanna hefur nú, sem áður segir, krafið Jón um nálega 25 milljónir í bætur fyrir hönd sonar síns, sem varð vitni að einni ofbeldislotunni, þá aðeins tólf ára. Málið var endurflutt í gær vegna tafa á uppkvaðningu dóms. - sh