Malarnáma formanns VG notuð við virkjanaframkvæmdir

Steingrímur J. Sigfússon formaður Vinstri grænna er einn af eigendum jarðarinnar Miðhúsa í Gnúpverjahreppi. Þar fyrirhugar Vegagerðin námu í tengslum við virkjanaframkvæmdir í neðri Þjórsá. Vegagerðinni er heimilt að taka 12 þúsund rúmmetra í Miðhúsum en það telst lítil náma. Þar af leiðandi er framkvæmdin óháð umhverfismati.

Þetta kemur fram í Sunnlenska Fréttablaðinu í gær.

Þar segir ennfremur að Steingrímur eigi 17% hlut í jörðinni, samkvæmt eignayfirliti á vefsíðu Vinstri grænna, en eiginkona hans, er ættuð frá Miðhúsum. Þar segir einnig að hann eigi 25% hlut í sumarhúsi á jörðinni.

Hreppsnefnd Skeiða- og Gnúpverjahrepps samþykkti á dögunum breytingu á aðalskipulagi sem heimilar tvær nýjar námur, í landi Miðhúsa og Minna-Hofs. Vegagerðin mun nota þær við uppbyggingu nýs tengivegar milli Árness og Landsvegar sem er lagður gagngert til virkjanaframkvæmda í neðri Þjórsá segir í fréttinni.

Þá segir að þrátt fyrir að framkvæmdin sé óháð umhverfismati muni hún skilja eftir sig sár og vegaslóða í fjallshlíðinni. Svæðið sé hins vegar ekki ósnortið því á sama stað var sóttur jarðvegur til línulagna fyrir mörgum árum.

Svanur Bjarnason, umdæmisstjóri Vegagerðarinnar, segir í fréttinni að óvíst sé hvenær vegaframkvæmdir við Þjórsá hefjist. Það sé Landsvirkjunar að segja til um slíkt.