Hagræða með milljarða kaupsamningi

Hafnarfjarðarbær hefur keypt fjórar fasteignir úr þrotabúi Nýsis hf. fyrir um 3,8 milljarða króna. Áður leigði bærinn þessar byggingar og rekstur þeirra af Nýsi. Kaupin og lok leigusamnings við Nýsi mun spara bænum gríðarlegar fjárhæðir, að sögn Lúðvíks Geirssonar bæjarstjóra.

„Það voru sextán til sautján ár eftir af þessum samningum,“ segir Lúðvík Geirsson. „Bara hagræðingin af leigu- og rekstrarsamningunum er hátt í 200 milljónir króna á næsta ári. Þetta er stórmál fyrir sveitarfélagið.“

Byggingar sem nú eru orðnar eign bæjarins en Nýsir átti áður eru skólahúsið í Lækjarskóla, íþróttahús Lækjarskóla, Íþróttamiðstöðin Björk í Haukahrauni og leikskólinn Álfasteinn á Hvaleyrarholti. Nýsir og Hafnarfjörður sömdu um það árið 2001 að Nýsir byggði þessi hús og annaðist rekstur þeirra í 25 ár gegn því að bærinn greiddi leigu.

Nýsir varð hins vegar gjaldþrota í október á þessu ári eftir að tilraunir til að endurskipuleggja rekstur fyrirtækisins báru engan árangur. Meðan þær tilraunir stóðu yfir leysti bærinn til sín rekstrarsamningana. Samningar um fasteignirnar náðust svo nýlega. Landsbankinn fjármagnar kaupsamninginn fyrir bæinn. Bankinn er einn stærsti kröfuhafinn í þrotabú Nýsis.

Bæjarstjórinn segir að þessi sparnaður sé langstærsti liðurinn í þeirri hagræðingu sem bærinn þurfi að ná fram vegna næsta árs. Ekki sé ólíklegt að þarna náist 15-20 prósent af heildarhagræðingu næsta árs. „Það segir okkur hversu óhagstæðir þessir samningar voru á sínum tíma. Framreiknað út samningstímann þýðir þetta 1,5-2 milljarða í sparnað fyrir bæinn. Að auki eigum við nú byggingarnar,“ segir Lúðvík.

Enn eru í gildi einkaframkvæmdarsamningar sem Hafnar­fjarðar­bær gerði fyrir 2002 við fyrirtækið Fjarðarhús um rekstur tveggja leikskóla og eins grunnskóla í Hafnarfirði. „Við höfum líka kallað eftir því að komast yfir þá samninga,“ segir Lúðvík, „en það hefur ekki náðst saman um það.“ Samningarnir við Fjarðarhús eru hins vegar talsvert hagstæðari bænum en samningarnir við Nýsi, segir Lúðvík.

peturg@frettabladid.is