Piparjúnkan áður verið kysst

Breska hefðardaman Susan Boyle, sem sló eftirminnilega í gegn í þættinum Britain´s got talent, hefur áður verið kysst þó hún haldi öðru fram.

Sjálf sagði Susan að hún væri piparjúnka og hefði aldrei verið kysst af karlmanni.

Nú hefur nágranni hennar, hinn rúmlega fimmtugi Brian Smith, stigið fram og sagst hafa margkysst Susan.

Í The Sun lætur hann hafa eftir sér að þau séu miklir og góðir vinir. Hann hafi verið stoð hennar og stytta eftir að hún missti tíræða móður sína fyrir þremur árum síðan.

„Það er ekki rétt að Susan hafi aldrei verið kysst," segir Brian og bætir við: „Ég hef gefið henni marga kossa á kinnina og sagt henni að þetta yrði allt í lagi."

Brian virðist vera góður sálusorgari því hún leitar mikið til hans að eigin sögn.