Hver mínúta skipulögð hjá Eurovision-hópnum

„Ég vinn bara svona, ætli það sé ekki ástæðan fyrir því að ég er enn í þessu djobbi," segir Jónatan Garðarsson, liðstjóri íslenska Eurovision-hópsins. Hópurinn fékk á föstudag yfirlit frá Jónatani hvernig dagskrá hópsins er háttað í Mosvku. Óhætt er hægt að fullyrða að hver einasta mínúta, hvert skref, sé skipulagt. Eiginlega er hvergi autt gat í tímaætluninni sem nær frá klukkan fjögur að morgni sunnudagsins 3.maí til klukkan fjögur síðdegis sunnudagsins 17.maí. Meðal þess sem Jónatan var búinn að setja niður á blað voru matmálstímar og háttatíminn. „Þegar svona mikið gengur á þarf oft að minna fólk á þessa annars sjálfsögðu hluti."

Jónatan segist alltaf hafa gert svona skjöl fyrir þá Eurovision-hópa sem hann hefur farið út. Og þeir eru þó nokkrir. „Þetta skjal hefur verið svona tvö ár í mótun, fyrstu árin skrifaði ég dagskránna bara frá degi til dags en það þótti ekki heppilegt enda finnst fólki betra að vita með góðum fyrirvara hvað sé að gerast," útskýrir Jónatan.„Það er mjög nauðsynlegt á svona stórum viðburði að allir gangi í takt."

Að sögn Jónatans er öryggisgæslan nokkuð mikil í Moskvu, menn þurfa til að mynda að vera með öll sín skjöl á sér því annars gætu þeir verið í vondum málum. „Öryggisgæslan er alltaf meiri eftir því sem austar dregur í álfunni, við verðum með einn til tvo öryggisverði og svo sérstaka rútu undir hópinn og einn fólksbíl," útskýrir Jónatan sem kveðst ekki hafa hugmynd um hvernig týpa sú ágæta bifreið verður. „Í fyrra vorum við á Skoda og svo höfum við verið á Benz, hins vegar skiptir mestu máli að hann geti komið manni á milli staða."- fgg