Víða mótmælt í dag

Boðað hefur verið til mótmæla víða um land í dag. Raddir fólksins með Hörð Torfason í fararbroddi boða til mótmælafundar á Austurvelli fimmtánda laugardaginn í röð en yfirskrift þess fundar er sem fyrr: Breiðfylking gegn ástandinu. Fundurinn hefst klukkan þrjú.

Korteri síðar mun annar fundur hefjast á Austurvelli en það er hópurinn Nýjar raddir sem stendur fyrir honum. Það er hópur sem segist ekki tengjast Herði Torfasyni né Vinstri grænum. Hópurinn vill þverpólitískt litróf sameinað um beint og milliliðalaust lýðræði, nýtt lýðveldi með tjáningarfrelsið að leiðarljósi. Hópurinn skorar á fólk úr öllum flokkum og stigum þjóðfélagsins að mæta og ávarpa fundinn en orðið verður gefið laust eins lengi og tími leyfir.

Það verður mótmælt víðar en í Reykjavík í dag. Mótmælastaða verður á bílastæðinu við Dimmuborgir í Mývatnssveit klukkan þrjú. Á fundinum verður stutt ávarp en svo verður gúmmískóm kastað á gullkálfinn og hann hrakinn á brott. Á Selfossi verður einnig fundur en þar verða ræður fluttar. Fundurinn hefst klukkan þrjú og verður við Ráðhúsið. Þá hefur verið boðað til mótmælafundar í Tjarnargarðinum á Egilsstöðum klukkan þrjú í dag.