Idol úrslit 2009 - myndir

Þegar úrslitin í Idolinu voru kynnt ætlaði allt um koll að keyra á áhorfendapöllunum í Smáralind. Það var hin 21 árs gamla Hrafna frá Djúpavogi sem hlaut sigur úr bítum með rúmlega 60% atkvæða og er Idol stjarna Íslands 2009.

Hátt í 70.000 atkvæði bárust í símakosningunni. Á móti henni í úrslitunum keppti hin 24 ára gamla Anna Hlín. Báðar stúlkurnar sungu þrjú lög í kvöld, eitt að eigin vali, annað sem samið var sérstaklega fyrir kvöldið og hið þriðja sem dómnefndin valdi fyrir þær.

Báðar stóðu þær sig glimrandi vel, en það gat því miður aðeins önnur þeirra staðið uppi sem sigurvegari. Það er á engan hallað þótt sagt sé að Hrafna hefur sífellt komið á óvart í keppninni, en einlægni hennar og fallegi tónn náði að lokum að sigra hjarta landsmanna og tryggja henni sigursætið. Þegar hún flutti sigurlagið, Ég fer alla leið, samglöddust hinir 11 úrslitakeppendurnir henni, enda er hún mjög vel liðin af öllum í Idolinu.

Ferðalag Hröfnu í Idolinu hefur verið ævintýri líkast, og ef maður mætti velja eitt væri það ævintýrið um hana Öskubusku sem kemur sterkt í hugann. Hrafna kom í áheyrnarprufu fyrir Idolið ásamt systur sinni, hafði sig svolítið til baka og ekki er hægt að segja að hún hafi litið út eins og næsta poppstarna Íslands.

Hún var kölluð af dómurum "poppstjarna í dulargervi barnapíu" til að byrja með, en síðan hefur margt vatn runnið til sjávar. Hún hefur gjörsamlega blómstrað sem söngkona og aukið öryggi sitt með hverri vikunni og uppi stendur stórglæsileg ung kona með bjarta framtíð fyrir sér á tónlistarbrautinni. Hún fór alla leið og lærði eins mikið og hún gat og var hrein og bein á meðan.

Við óskum Hröfnu innilega til hamingju með titillinn og að sjálfsögðu 2 milljónir króna sem hún hlaut í verðlaun. Hún hyggst nýta peningana til góðra nota við áframhaldandi tónlistariðkun og nám.

Ævintýrin gerast enn og ljóst er að í Idolinu - getur allt gerst.