Hermann í byrjunarliðinu í leiknum mikilvæga við Burnley

Hermann Hreiðarsson er í byrjunarliði Portsmouth fyrir heimaleik liðsins á móti Burnley í ensku úrvalsdeildinni en þetta er hádegisleikurinn í dag.

Avrin Grant gerir tvær breytingar á liðinu frá tapinu á móti Manchester United, Tommy Smith kemur inn fyrir Federic Piquionne og Steve Finnan leysir af Younes Kaboul sem er í leikbanni. Jóhannes Karl Guðjónsson er sem áður á varamannabekknum hjá Burnley.

Portsmouth er með 7 stig út úr síðustu 14 leikjum og hefur tapað þremur leikjum í röð. Liðið er þremur stigum á eftir Wolves og sjö stigum á eftir West Ham sem er í síðasta örugga sæti.

Leikurinn við nýliða Burnley, sem eru átta sætum og ellefu stigum ofar, er einn af úrslitaleikjunum fyrir Portsmouth ætli liðið að bjarga sér frá falli.