HM gæti verið í hættu hjá Fernando Torres

Rafael Benítez, stjóri Liverpool, hefur varað menn við því að Fernando Torres gæti verið að glíma við kviðslitsmeiðslin sín það sem eftir er af tímabilinu.

Þessi leiðinlegu meiðsli gætu því haft áhrif á þátttöku Torres á HM í Suður-Afríku þar sem Evrópumeistarar Spánverja ætla sér stóra hluti. Sérfræðingur á Spáni ráðlagði Torres að hvíla í stað þess að fara í aðgerð.

Torres fór ekki með Liverpool-liðinu til Blackburn fyrir leik liðanna í dag en hann hefur ekkert spilað undanfarnar fimm vikur. Torres er hinsvegar farinn að æfa og allt lítur ágætlega út í baráttu hans við að ná sér góðum af kviðslitinu.

Þrátt fyrir að Torres sé byrjaður að æfa með Liverpool þá tók hann ekki þátt í fullum æfingum í vikunni og mun víst enn finna til smá óþæginda í náranum. Benítez býst alveg eins við að hann dragi þessi meiðsli á eftir sér út tímabilið.