Kaup vekja upp deilur

Á laugardag, fáeinum dögum eftir að tilkynnt var að Kristján Guðmundsson fengi fyrstur íslenskra myndlistarmanna aðalverðlaun Carnegie, komst Sigurður Guðmundsson í fréttir þegar Morgunblaðið greindi frá því að Listasafn Íslands hefði fest kaup á ljósmynd hans, Mountain eða Fjalli, sem er lykilverk á ferli hans frá áttunda áratugnum.

Það var gallerí listamannsins hér á landi sem seldi verkið, sem er frumeintak af ljósmynd sem sýnir Sigurð sem lag í tilbúnu fjalli úr bókum, brauðum og torfi. Verkið hefur beina skírskotun í eitt vinsælasta myndefni íslenskrar myndlistar á síðustu öld sem þekktast er í verkum landslagsmálara á borð við Kjarval og Jón Stefánsson en er einnig þekkt í verkum næfista eins og Stefáns Jónssonar og Jóns föður hans. Fjallið hans Sigurðar var í hópi þeirra konseft-verka sem beindu kastljósi að honum á þessum árum upp úr 1970 og tryggðu honum eina af fyrstu sýningunum í Pompidou-safninu.

Greiddar voru tíu milljónir fyrir verkið og er greiðslum dreift til tveggja ára. Af þeim tekur gallerí i8 um helming. Verðið þykir leikmönnum hátt ef marka má umkvartanir á vefnum um helgina, en er raunar heldur lágt miðað við mikilvægi verksins og stöðu þess í íslenskri myndlist. Er þá litið bæði til hins vestræna uppboðsmarkaðar og verka eftir listamenn sem komu upp á þessu tímabili og mótuðu stefnur í myndlist Vesturlanda eins og Kristján gerði, fáist þau á annað borð keypt.

Verður Listasafn Íslands að teljast heppið að hafa hreppt hnossið og er það i8 til sóma að selja verkið hingað en ekki til annarra safna austan eða vestan hafsins. Kaupverðið telur helming ársframlags safnsins til listaverkakaupa en það hefur um árabil búið við svo veikan kaupmátt að það stendur safninu fyrir þrifum. Það verður því að mestu leyti að reiða sig á lán verka til að sýna þeim þúsundum innlendra og erlendra gesta sem það sækja.pbb@frettabladid.is