Forsetinn hefur hálfan mánuð til að staðfesta Icesave

Ingimar Karl Helgason skrifar 28. ágúst 2009 12:06

Íslensk stjórnvöld bíða með öndina í hálsinum eftir viðbrögðum Breta og Hollendinga, við fyrirvörum Alþingis við ríkisábyrgðina. Forseti Íslands hefur hálfan mánuð til að staðfesta lögin.

Fjárlaganefnd Alþingis gerði þann meginfyrirvara við Icesave frumvarpið, að ríkisábyrgð öðlaðist ekki gildi, nema Hollendingar og Bretar féllust á alla fyrirvara.

Fram hefur komið að Bretum og Hollendingum hefur verið haldið upplýstum um gang mála. Stjórnmálamenn og aðrir innan úr embættismannakerfinu sem fréttastofa hefur rætt við, segja hins vegar fátt um viðbrögð þeirra.

Heimildarmaður sem fréttastofa ræddi við í morgun, sagði að nú, þegar ríkisábyrgðin er orðin að lögum, bíði menn viðbragða þeirra með öndina í hálsinum. Fréttastofa leitaði viðbragða Breta nú fyrir hádegið, en hafði ekki fengið svör, þegar fréttatíminn hófst.

Þegar Alþingi hefur samþykkt frumvarpið sem lög, er það sent í prentun. Það fara fer það til ríkisstjórnarinnar. Ráðherra gerir svo tillögu til forsetans um að hann staðfesti lögin. Þau öðlast gildi með undirskrift forsetans, og eru síðan birt í stjórnartíðindum. Leggja á samþykkt lagafrumvarp fyrir forsetann ekki síðar en tveimur vikum eftir samþykkt Alþingis.

Veiti forsetinn ekki samþykki, þá halda lögin gildi sínu, en þarf að leggja fyrir þjóðaratkvæði. Það hefur einu sinni gerst að forseti hafi ekki skrifað undir; þegar Ólafur Ragnar Grímsson synjaði umdeildum fjölmiðlalögum samþykkis, og vísaði þá meðal annars til þess að gjá væri milli þings og þjóðar.

Tengdar fréttir

Fyrirvararnir styrkja samningana

Fyrirvarar Alþingis við Icesave samningana við bresk og hollensk stjórnvöld styrkja samningana, að mati Steingríms J. Sigfússonar fjármálaráðherra. Í umræðum á Alþingi í morgun sagði hann að í umræðunni um samningana undanfarin misseri hafi verið reynt að færa sökina frá þeim sem orsökuðu vandamálið yfir á þá sem bera ábyrgð á því að leysa málið. Hann sagðist ekki telja að sú söguskýring muni halda í framtíðinni. „Það gat aldrei komið lítill og sætur samningur til að leysa úr svona stóru máli."

28. ágúst 2009 09:36

Ríkisábyrgð á Icesave samþykkt

Icesave frumvarp ríkisstjórnarinnar var rétt í þessu samþykkt með 34 atkvæðum gegn fjórtán. Fjórtán greiddu ekki atkvæði um málið, en einn var fjarverandi.

28. ágúst 2009 11:12

Fellum samningana og gerum nýja

Sigmundur Davíð Gunnlaugsson, formaður Framsóknarflokks, gagnrýndi ríkisstjórnina fyrir framgöngu sína í Icesave málinu við upphaf þingfundar í morgun. Hann lagði til að frumvarpið um ríkisábyrgð yrði fellt og nýr samningur gerður.

28. ágúst 2009 09:43

Atkvæði um Icesave greidd í dag

alþingi Þingmenn stjórnarandstöðuflokkanna létu ríkisstjórnina – og þá sér í lagi Steingrím J. Sigfússon fjármálaráðherra – heyra það í þriðju umræðu um Icesave-frumvarpið sem stóð á Alþingi í allan gærdag og fram á kvöld. Töldu þeir stjórnvöld hafa haldið illa á málinu og í raun klúðrað því. Ætlan þeirra hafi verið að keyra málið óbreytt í gegnum þingið en til allrar lukku hafi það breyst mjög til betri vegar.

28. ágúst 2009 01:00

Breið samstaða ákaflega dýrmæt

Jóhanna Sigurðardóttir, forsætisráðherra, segir breiða samstöðu í Icesave málinu ákaflega dýrmæta fyrir framhaldið. Hún segir næsta verkefni ráðamanna vera að sannfæra Breta og Hollendinga um að íslenska þjóðin sé ekki að hlaupast undan ábyrgð heldur þvert á móti að axla ábyrgð.

28. ágúst 2009 09:11

Megum ekki gefast upp

Birgitta Jónsdóttir, þingflokksformaður Borgarahreyfingarinnar, gagnrýndi að Íslendingar tækju á sig einkaskuld sem skert gætu lífsgæði þjóðarinnar. Hún talaði um fólkið sem nú færi úr landi með þekkingu sína og reynslu, meðal annars vegna samninganna.

28. ágúst 2009 10:10

Svona kusu þau í Icesave málinu

Ríkisábyrgð á Icesave samningana var samþykkt á Alþingi í dag. 34 þingmenn greiddu frumvarpinu atkvæði sitt, 14 sögðu nei og 14 sátu hjá. Einn þingmaður var fjarverandi.

28. ágúst 2009 11:34

Ríkisstjórnin treystir á minnihlutann

Bjarni Benediktsson, formaður Sjálfstæðisflokksins, segir það vera hættumerki að ríkisstjórnin vilji keyra Icesave málið í gegnum Alþingi þrátt fyrir litla samstöðu í þinginu. Ríkisstjórnin stefni í fen því hún verði aldrei neitt annað en valdabandalag Samfylkingar og Vinstri grænna sem treysti á stjórnarandstöðuna að leysa úr erfiðustu vandamálum sínum. Íslenska þjóðin eigi mun betra skilið.

28. ágúst 2009 09:19