Megum ekki gefast upp

Birgitta Jónsdóttir, formaður Borgarahreyfingarinnar, gagnrýndi að Íslendingar tækju á sig einkaskuld sem skert gætu lífsgæði þjóðarinnar. Hún talaði um fólkið sem nú færi úr landi með þekkingu sína og reynslu, meðal annars vegna samninganna.

Birgitta var fjórði  flokksformaðurinn til að ávarpa Alþingi, en allir fá þeir um tíu mínútna ræðutíma áður en atkvæðagreiðsla um Icesave frumvarpið hefst.

Þá gagnrýndi hún að sumarþingið hefði farið í Evrópusambandsumræður og Icesave, en ekki neyðarráðstafanir fyrir heimili.

Hún sagði þó þrátt fyrir allt hafa séð ljós í því að þingheimur hafi hafið sig ofar flokkspólitík og sameinast um að finna sem farsælasta niðurstöðu í Icesave deilunni.

Hún sagðist styðja fyrirvarana heilshugar og sagði þá mikilvægan grunn að nýjum samningi. Fyrirliggjandi samning sagði hún hinsvegar handónýtan og kött í sekknum.

Við lok ræðu sinnar stappaði hún stáli í þjóðina og sagði hana ekki mega gefast upp þó ríkisábyrgðin yrði samþykkt.