Ekki verið að refsa Kolbrúnu

Svandís Svavarsdóttir borgarfulltrúi er hástökkvari forvals Vinstri grænna í Reykjavík þar sem konur unnu almennt sigra.

Sigurður Ingi Jóhannsson dýrlæknir leiðir lista Framsóknarmanna í Suðurkjördæmi þar sem Guðni Ágústsson leiddi áður en Eygló Þóra Harðardóttir sem kom inn á þing sem varamaður, verður í öðru sæti.

Siv Friðleifsdóttir, eini þingmaður Framsóknarflokksins í Suðvesturkjördæmi, vann sannfærandi sigur í prófkjöri flokksins í gær og leiðir því listann en Helga Sigrún Harðardóttir varð í öðru sæti. En sá fágæti atburðir gerðist í prófkjörinu að fimm konur röðuðu sér í efstu sætin, en vegna reglna flokksins um kynjakvóta, setjast karlar í þriðja og fimmta sæti listans.

Konur voru líka áberandi í forvali Vinstri grænna í Reykjavík. Katrín jakobsdóttir fékk glimrandi kosningu í fyrsta sætið en á eftir henni röðuðu sér Svandís Svavarsdóttir borgarfulltrúi og í þriðja sæti er Lilja Mósesdóttir hagfræðingur. Árni Þór Sigurðsson alþingismaður er í fjórða sætinu en á eftir honum koma þingkonurnar Álfheiður Ingadóttir og Kolbrún Halldórsdóttir, en til að þær nái endurkjöri á Alþingi þarf flokkurinn að bæta við sig tveimur mönnum í borginni.

Svandís segir að þetta hafi verið það sem hún hafi stefnt að, að leiða lista í öðruhvoru Reykjavíkurkjördæminu og það hafi tekist. Hún sé ánægð með að félagar sínir skyldu hafa treyst sér í það vandaverk að leiða annan listann.

Kolbrún Halldórsdóttir umhverfisráðherra hafnar í sjötta sæti og virðist ekki hafa notið ráðherradómsins. Svandís segir að ekki sé verið að refsa Kolbrúnu. Hópurinn sé sigurstranglegur og Kolbrún skipi baráttusæti á öðrum hvorum listanum.

Björgvin G. Sigurðsson fyrrverandi viðskiptaráðherra varð efstur í prófkjöri Samfylkingarinnar í Suðurkjördæmi í gær og Oddný Guðbjörg Harðardóttir í öðru sæti, en flokkurinn hefur tvo þingmenn í kjördæminu í dag.