Íslenskum lífeyrisþegum búsettum erlendis fjölgar

Íslenskum elli- og örorkulífeyrisþegum sem voru skráðir erlendis hefur fjölgað þrátt fyrir gengisþróunina en þeim fjölgaði um tæplega hundrað síðustu tíu mánuði. Bætur eru greiddar í íslenskum krónum til banka sem millifærir inn á reikninga viðkomandi í erlendri mynt. Gengið í þeim millifærslum er alfarið mál bankans og viðskiptavinarins.

Fjöldi elli- og örorkulífeyrisþega sem voru skráðir erlendis með réttindi, hvort sem þeir þáðu bætur eða ekki, fjölgaði um 97 frá nóvember 2008 til september 2009. Þetta kemur fram á vef Tryggingarstofnunar. Þeir voru 1345 í nóvember 2008 en 1442 í september 2009 og þar af eru 880 ellilífeyrisþegar.

Auk þeirra lífeyrisþega sem hafa skráð sig í öðru landi eru margir lífeyrisþegar sem dvelja langdvölum erlendis og lifa þar af lífeyri sínum án þess að skrá lögheimili sitt þar. Tryggingastofnun hefur ekki upplýsingar um þessa einstaklinga.