Katrín ætlar að kanna innheimtuaðgerðir RÚV

Ólöf Nordal þingmaður sjálfstæðismanna vakti á þingi í dag athygli á auglýsingum Ríkisútvarpsins undanfarið þar sem fólk er hvatt til þess að greiða afnotagjöldin ella verði skuldirnar settar í lögfræðiinnheimtu. Ólöf spurði Katrínu Jakobsdóttur menntamálaráðherra að því hvort þetta samræmdist tilmælum ríkisstjórnarinnar um að vægt verði tekið á skuldurum.

Katrín sagðist ekki kannast við þessar boðuðu aðgerðir og ætlar hún að spyrjast fyrir um málið hjá RÚV. Katrín sagði sjálfsagt að ríkisstofnanir gangi mildilega fram í innheimtuaðgerðum sínum og að RÚV sé ekki undanskilið í því efni.