Ótakmörkuð erlend tónlist

Lagaúrvalið á síðunni Tónlist.is hefur verið aukið úr 50 þúsund lögum í 2.500.000 lög eftir að samningar náðust við erlenda útgáfurisa.

Tónlist.is hefur náð samningum við erlendu útgáfurisana Universal, SonyBMG, Warner og EMI, auk smærri aðila sem felur í sér að loksins geta Íslendingar sótt sér erlenda tónlist á Netinu með löglegum hætti.

„Við erum mjög spenntir enda tveggja ára vinna að baki. Við erum allir orðnir gráhærðir og skeggjaðir en loksins er þetta komið og það er nett spennufall,“ segir Engilbert Hafsteinsson, framkvæmdastjóri D3, sem rekur Tónlist.is.

Breytingin felur í sér að notendur síðunnar geta nú valið um að hlaða erlendri tónlist niður til eignar, t.d. fyllt á iPod, eða greitt eitt áskriftargjald og hlustað á tónlist í tölvunni eða í farsímanum. Núna geta notendur sem sagt dreift tónlistinni um hina ýmsu miðla án þess að greiða oftar en einu sinni fyrir hana.

„Á gamla mátann þurfti að kaupa tónlistina kannski fimm sinnum en núna geta menn keypt hana einu sinni óvarða og gert það sem þeir vilja við hana. Við erum eiginlega með þeim fyrstu í heiminum sem erum að bjóða upp á svona,“ segir Engilbert. Borgi menn til dæmis 2.700 króna áskriftargjald á mánuði geta þeir fengið ótakmarkaðan aðgang að innlendu og erlendu efni og gert hvað sem þeir vilja við það.

„Fyrir andvirði eins geisladisks geturðu fengið þá alla,“ segir Engilbert.

Erlend útgáfufyrirtæki hafa hingað til viljað læsa tónlist sinni til að henni yrði ekki dreift út um allt. Sú hugmyndafræði virðist nú vera að syngja sitt síðasta og má segja að menn hafi játað sig sigraða í baráttunni við netverja sem dreifa tónlist á ólöglegan hátt á Netinu.

Engilbert telur að draga muni úr ólöglegu niðurhali á erlendri tónlist með breytingunum. „Svarið við ólöglegu niðurhali er að vera með nógu gott aðgengi á sanngjörnu verði.“ Bætir hann við að meira öryggi felist í því að kaupa tónlist á löglegan hátt. Bæði séu vírusar úr sögunni og gæðin oftast töluvert betri.

Yfir fimmtíu þúsund notendur eru skráðir hjá Tónlist.is. Tvöföldun varð í sölu á síðunni á milli áranna 2007 og 2008.

„Við erum hvergi nærri hættir og vefurinn er í stöðugri þróun,“ segir Engilbert.freyr@frettabladid.is