Ný bílaleiga býður áður óþekkt verð á bílaleigubílum

Í ljósi fréttar Stöðvar 2 í vikunni af gríðarlega háu verði á bílaleigubílum á Íslandi, hefur nýja bílaleigan Thrifty, í samstarfi við Brimborg, ákveðið að bjóða verð á bílaleigubílum í sumar sem þeir segja að sé áður óþekkt.

Eins og fram kom í fréttum Stöðvar 2, getur leiguverð fyrir almennan fólksbíl í viku numið ráðstöfunartekjum venjulegrar fjölskyldu á Íslandi. Sumartilboð Thrifty og Brimborgar er nýr kostur í ferðamöguleikum landsmanna sem ætti að gera fleiri fjölskyldum fært að skoða landið sitt. Hægt verður að leigja bílana í 30 daga á tilboðsverði.

Dýrasti bílaleigubíll sem Thriftys bíður er Ford Expedition jeppi, en þrjátíu daga leiga á honum kostar tæpar 125 þúsund krónur. Þrjátíu daga leiga á Ford Escape sportjeppa kostar 75 þúsund krónur og hægt er að leigja smábíl á innan við 40 þúsund krónur í þrjátíu daga. Þeir bílar sem hér um ræðir eru frá árinu 2006 og eldri.

Eins og fram kom í fréttum Stöðvar 2 í vikunni getur vikuleiga á nýjum og nýlegum Land Rover jeppa hjá öðrum bílaleigubílum farið upp í ríflega 500 þúsund krónur. Vísir hafði í dag samband við Avis bílaleigu og kostar vikuleiga á Land Rover jeppa hjá bílaleigunni tæpar 400 þúsund krónur. Þeirra bílaleigubílar eru hins vegar frá árinu 2008 og yngri.

„Að auki verður boðið uppá þá nýbreytni að gefa viðskiptavinum kost á að láta leiguverðið ganga að fullu upp í kaupverð á bílnum sem leigður var. Leiguverðið verður sem sagt dregið frá ásettu markaðsvirði viðkomandi bíls," segir Guðný Camilla Aradóttir, hjá almannatengslafyrirtækinu cohn&wolf sem sér um málið fyrir hönd Brimborgar.

Thrifty bílaleigan er ný á Íslandi, en fyrsta Thrifty bílaleigan tók til starfa í Bandaríkjunum árið 1958 og nú eru Thrifty bílaleigur um allan heim. Leyfishafi Thrifty á Íslandi er Brimborg.