Ekki mistök að láta Svavar leiða Icesave nefndina

Fjármálaráðherra segir það ekki hafa verið mistök að láta Svavar Gestsson leiða Icesave samningarnefndina í stað þess að fá erlendan sérfræðing í verkið.

Lee Buccheit kom hingað til lands í nóvember á síðasta ári til að flytja erindi í Háskóla Íslands. Hann fundaði þá með þáverandi ríkisstjórn Sjálfstæðisflokks og Samfylkingar þar sem samkvæmt heimildum fréttastofu hann bauð fram aðstoð sína í málum tengdum hruninu.

Ekkert varð þó af því að Buccheit hæfi störf fyrir íslenska ríkið. Guðfríður Lilja Grétarsdóttir, þingmaður Vinstri grænna, óskaði eftir því fyrir nokkru að fá hann aftur hingað til lands til ráðgjafar. Steingrímur J. Sigfússon, fjármálaráðherra, átti fund með Buccheit í gær þar sem staða landsins var rædd og samskipti við alþjóðasamfélagið.

Steingrímur segir að það hafi verið hugleitt að láta erlenda sérfræðinga leiða samninganefndina. Það hafi hins vegar verið ákveðið að manna samninganefndina úr stjórnsýslunni.