Varaði Icelandair Cargo við vopnaflutningum til Georgíu

Sendiherra Rússlands segist hafa varað Icelandair Cargo við vopnaflutningum til Georgíu eftir að stríð milli Rússa og Georgíumanna skall á fyrir rúmu ári. Framkvæmdastjóri Icelandair Cargo kannast ekki við það.

Í viðtali við Netvarpið.is fjallar Victor I. Tatarinsev um að Icelandair Cargo hafi í tvígang flutt bandaríska riffla til Georgíu skömmu áður en til átaka kom milli Rússa og Georgíumanna um georgíska aðskilnaðarhéraðið Suður-Ossetíu. Fréttastofa Stöðvar 2 og Vísis greindi frá því máli fyrstur miðla í fyrra.

Sendiherrann segist hafa farið á fund stjórnenda flutningaflugfélagsins og varað þá við slíkum ferðum og ráðið þeim frá því að aðstoða við að vopna árásaraðila.

Victor segir að stjórnendur hafi sagt honum að þeir myndu ekki fara aftur í slíkar ferðir.

Grétar Már Sigurfinnsson, framkvæmdastjóri Icelandair Cargo kannast ekki við þetta.

„Nei, ég kannast ekki við það. Hins vegar leggjum við áherslu á það hjá Iceladair Group að eiga góð samskipti við erlenda sendifulltrúa og hittum þá oft. Þanni að ég kannast ekki við að hafa fengið svona fyrirmæli þannig að mér finnst ólíklegt að það hafi átt sér stað. En ég hef ekki náð í stjórnarformann eða forstjóra grúppunnar til að fá það staðfest."