Norður-Kórea harmar mannskæða flóðbylgju

Stjórnvöld í Norður-Kóreu hafa harmað að sex Suður-Kóreumenn skyldu farast þegar vatni úr stíflu var hleypt í fljót sem rennur frá norðri til suðurs.

Fólkið var í útilegu við Imjin fljót þegar flóðbylgjan kom og hreif það með sér. Óvenjulegt er að hin harðlokaða Norður-Kórea viðurkenni mistök af nokkru tagi.

Í yfirlýsingu frá sameiningarráðuneyti Suður-Kóreu segir að norðanmenn hafi harmað þetta en sagt að nauðsynlegt hafi verið að minnka þrýsting á stífluna.

Jafnframt var lofað að láta vita af því með góðum fyrirvara ef aftur þyrfti að hleypa vatni út í Imjin fljót.