Skýrsla um fóstureyðingar í 197 löndum

Fóstureyðingar eru nokkurn veginn jafn-algengar í þeim löndum sem banna þær og þeim sem gera það ekki.

Þetta kemur fram svart á hvítu í nýrri skýrslu Guttmacher-stofnunarinnar bandarísku. Gerð var úttekt á tíðni og lögmæti fóstureyðinga í 197 löndum og kom þá meðal annars í ljós að um 40 prósent kvenna heimsins búa við strangar reglur um fóstureyðingar eða algjört bann við þeim.

Rannsóknin tók tíu ár og sýnir þróunina árin 1995 til 2005. Á þeim tíma slökuðu 19 lönd á löggjöf sinni um fóstureyðingar en þrjú hertu löggjöfina. Árið 2003 voru rúmlega 41 og hálf milljón fóstureyðinga framkvæmdar í heiminum þannig að skráð væri en 45 og hálf milljón árið 1995.

Helstu niðurstöður skýrslunnar eru þær að hert löggjöf um fóstureyðingar og þar með takmarkaðri völ á löglegri fóstureyðingu kemur ekki í veg fyrir að konur reyni að láta eyða fóstri eftir einhverjum leiðum og hefur ólöglegum fóstureyðingum ekki fækkað svo neinu nemi. Bætt aðgengi að getnaðarvörnum hefur hins vegar, að mati skýrsluhöfunda, fækkað fóstureyðingum á því tímabili sem til skoðunar var.