Illugi með töluvert forskot á Guðlaug

Illugi Gunnarsson alþingismaður nýtur töluvert meiri stuðnings en Guðlaugur Þór Þórðarson alþingismaður í fyrsta sæti á lista Sjálfstæðisflokksins í Reykjavík ef marka má niðurstöður nýrrar könnunar MMR.

Af þeim sem sögðust gera ráð fyrir að kjósa í prófkjöri sjálfstæðismanna sem fram fer um næstu helgi sögðust 50,4% vilja að Illugi Gunnarsson leiði lista Sjálfstæðisflokksins í Reykjavík, 21,5% sögðust vilja að Guðlaugur Þór Þórðarson leiði listann, 20,7% sögðu hvorugur og 7,4% sögðust ekki vita hvorn þeir vilji eða vildu ekki svara spurningunni.

Af þeim sem sögðust líklega myndu kjósa Sjálfstæðisflokkinn í næstu kosningum sögðust 52,6% vilja að Illugi leiði listann, 26,6% sögðust vilja að Guðlaugur Þór leiði listann, 13,8% segja hvorugur og 7,0% sögðust ekki vita hvorn þeir vilja eða vildu ekki svara.

Um er að ræða netkönnun sem var gerð dagana 6. - 11. mars 2009. Úrtakið var valið með slembiaðferð úr þjóðskrá í aldurshópnum 18-59 ára. Alls svöruðu 604 könnuninni.

Samkvæmt heimildum Vísis var könnunin gerð fyrir stuðningsmenn Illuga Gunnarssonar.