Innlent

Fundaði með borgarstjóra um minnisvarða um Helga

Magnús Már Guðmundsson skrifar
Mynd/GVA
„Hanna Birna tók vel í þetta og var mjög almennileg. Hún sagði að borgin væri mjög opin fyrir þessu," segir Alexander Freyr Einarsson, forsvarsmaður hóps sem vill reisa minnisvarða um mótmælandann Helga Hóseasson sem lést 6. september. Alexander fundaði með Hönnu Birnu Kristjánsdóttur, borgarastjóra, um málið í dag.

Sú hugmynd hefur verið rædd að undanförnu að reisa minnisvarða um Helga á gatnamótum Langholtsvegar og Holtavegar, en þar stóð hann gjarnan með skiltin sín. Alexander hefur í samráði við ættingja Helga hrundið af stað söfnun svo slíkur minnisvarði verði reistur.

Alexander segir fundinn með borgarstjóra hafi verið afar góðan. Hanna Birna telji heppilegra að frumkvæðið komi frá áhugafólki eða hollvinasamtökum frekar en Reykjavíkurborg. Borgin muni aftur á móti taka vel í slíkt erindi og vinna með áhugafólki svo hægt verði að reisa minnisvarða um Helga.

„Það eru ekki miklar líkur á því," segir Alexander aðspurður hvort að hugsunin sé að reisa styttu. Hanna Birna hafi bent á að það væri ekki auðvelt skipulagslega séð. Auk þess telji fjölskylda Helga það ekki vera í anda hans að reisa slíka styttu.

„Söfnunin hefði mátt ganga betur en ég er ekki ósáttur," segir Alexander og bætir við að til standi að stofna félag og reikning utan um söfnunina. Í framhaldinu verði farið í söfnunarátak. Þangað til geti fólk lagt inn á núverandi reikning söfnunarinnar. Það er 0323-26-002289 og er kennitalan 260390-2289.


Tengdar fréttir

Virðing borin fyrir Helga

„Þeir eru mjög margir sem hafa áhuga á þessu. Ég finn fyrir því í samfélaginu að þótt fólk sé ekki endilega sammála öllu sem Helgi sagði, þá ber það virðingu fyrir þeirri staðfestu sem hann sýndi í sinni áralöngu baráttu," segir Dagur B. Eggertsson, oddviti Samfylkingar í borgarstjórn Reykjavíkur.

Helgi Hóseasson látinn

Helgi Hóseasson lést á elliheimilinu Grund í morgun, 89 ára að aldri. Helgi sem hefur verið nefndur mótmælandi Íslands fæddist í Höskuldstaðarseli í Breiðdal þann 21.nóvember árið 1919. Hann var næst elstur fjögurra systkina.

Vill funda með borgarstjóra um minnisvarða um Helga Hóseasson

„Við erum á byrjunarreit en ég vonast til þess að þegar fleiri frétti af söfnuninni að þá fari eitthvað að streyma inn,“ segir Alexander Freyr Einarsson . Hann hefur í samráði við ættingja Helga Hóseassonar ákveðið að hrinda af stað söfnun til þess að hægt verði að reisa minnisvarða um Mótmælanda Íslands, eins og Helgi var oft kallaður.

Ekki borgarinnar að reisa styttu fyrir Helga Hóseasson

„Ef það er svona mikill áhugi fyrir málinu og 20 þúsund manns búnir að skrá sig fyrir því að þá þarf í raun og veru hver og einn ekki að borga nema þúsund kall í framlag og þá eru komnar 20 milljónir fyrir styttunni," segir Óskar Bergsson,

Fleiri vilja styttu en mótmæltu Icesave

Fleiri vilja reisa minnisverða um Helga Hóseasson en skoruðu á forseta Íslands á samskiptavefnum Facebook að skrifa ekki undir eitt umdeildasta mál síðari ára, ríkisábyrgð vegna Icesave reikninga Landsbankans.

Minnisvarðinn

Nú fer eins og eldur í sinu um óravíddir internetsins hvatningarboðskapur um að reisa eigi líkneskju, ellegar einhvers konar minnismerki, um Helga Hóseasson. Hugmyndin er góðra gjalda verð, enda meira um vert að minnast manns sem stóð á rétti sínum einn og óstuddur gegn kerfisbákninu, en góðskálda og broddborgara þessa lands.

Simmi og Jói heiðra minningu mótmælenda Íslands

Útvarpsmennirnir Sigmar Vilhjálmsson og Jóhannes Ásbjörnsson, eða Simmi og Jói eins og þeir eru kallaðir, ákváðu að heiðra minningu Helga Hóseassonar og gerðu um lag um hann sem var frumflutt í þætti þeirra í morgun.

Tvö þúsund manns vilja reisa minnisvarða um mótmælanda Íslands

Rúmlega 2000 manns vilja reisa minnisvarða um Helga Hóseasson sem lést á elliheimilinu Grund í gærmorgun, 89 ára að aldri. Helgi hefur oft verið nefndur mótmælandi Íslands. Einna þekktastur var Helgi fyrir kröftug mótmæli sín gegn ríki og kirkju en hann vildi ógilda skírnarsáttmála sinn.

Mest lesið


Fleiri fréttir

Sjá meira


×

Mest lesið