Úrslitin í American Idol ráðast í kvöld

IDOL-AÐDÁENDUR um heim eru með öndina í hálsinum í dag en í kvöld liggur fyrir hver sigrar American Idol - Adam Lambert og Khris Allen. Stöð 2 sýnir beint frá úrslitasþættinum og hefst beina útsendingin á miðnætti. Á undan verður flutningur tvímenninganna frá því í gær sýndur í heild sinni en þar sungu þeir þrjú lög hver. Einn gamlar sálarstandard, eitt af þeim lögum sem þeir sungu áður í keppninni og telst til hápunkta þeirra og svo frumsamið Idol-lag „No Boundaries" sem Idol-dómarinn Kara DioGuardi er meðhöfundur að. Adam tók gamla sálarstandard Otis Redding „A Change is Gonna Come", endurtók listilegan flutning sinn á gamla Tears For Fears-laginu „Mad World" á meðan Khris tók Marvin Gaye klassíkina „What's Going On" og Bill Withers-standardinn „Ain't No Sunshine".

Báðir keppendur stóðu sig frábærlega að mati dómnefndar og sýndu það og sönnuðu svo um munaði að þeir áttu skilið að ná alla leið í úrslit. Er það og mál manna að keppnin hafi sjaldan verið tvísýnni en sitt sýnist hverjum um það hvor fer með sigur úr bítum í símakosningunni en gert er ráð fyrir að hátt í 100 milljónir atkvæða verði greidd á þeim sólarhring sem símakosning stendur yfir.

Úrslitaveislan í American Idol hefst klukkan 23 með flutningi Adams og Kris frá því í gærkvöldi eins og fyrr segir en strax að því loknu uppúr miðnætti hefst sjálfur úrslitaþátturinn í beinni útsendingu en þulur þar verður Idol-sérfræðingurinn og útvarpsmaður á Bylgjunni, Ívar Guðmundsson.

Meðfylgjandi er YouTube-myndband af Adam Lambert sem fer eins og eldur í sinu um heiminn en þar syngur hann eins og engill á menntaskólaútskrift sinni. Eins og glögglega má sjá þá er hárliturinn allt annar og ljósari en Adam hefur viðurkennt að rauður sé hans raunverulegi hárlitur.

Til að gæta jafnræðis er hér flutningur með Kris á lagi sem hann tók upp áður en Idol-ævintýri hans hófst. Það sýnir að hann er síður en svo byrjandi á tónlistarsviðinu en þess má geta að hann er sprenglærður fiðluleikari.

http://www.youtube.com/watch?v=bErXVBLpkB8