Þrefalt sprengjutilræði í Írak

Rúmlega 20 eru látnir í borginni Ramadi í vesturhluta Íraks eftir þrefalt sprengjutilræði þar í gær. Fyrst var bíl, stútfullum af sprengiefni, ekið á vegg lögreglustöðvar og hann sprengdur í loft upp. Þegar forvitnir vegfarendur og lögregluþjónar höfðu safnast á vettvang sprakk önnur sprengja sem komið hafði verið fyrir á mótorhjóli sem stóð skammt frá. Þriðja sprengjan sprakk svo örskömmu síðar við sjúkrahús borgarinnar en henni hafði verið komið fyrir í bíl. Það er þekkt aðferðafræði hjá al-Qaeda-samtökunum að sprengja sprengju til að draga vegfarendur og löggæslumenn á vettvang og sprengja svo aðra á sama stað þegar fólkið hefur hópast á staðinn.