Ók á 160 til að komast á klósett

Erlend kona, sem er ferðamaður hér á landi, og var staðin að ofsaakstri á milli Hellu og Hvolsvallar undir kvöld í gær, reyndist líka vera undir áhrifum áfengis. Þegar lögreglan á Hvolsvelli hafði mælt bíl hennar á tæplega 160 kílómetra hraða var henni gefið stöðvunarmerki, sem hún sinnti ekki, heldur hélt rakleiðis að Hótel Rangá, þar sem hún nam staðar. Hún gaf þá skýringu að hún hafi verið í spreng og þurft að komast á salerni sem fyrst. Við öndunarpróf kom fram áfengismagn í blóði og var málinu lokið með sekt upp á hátt í tvö hundruð þúsund krónur.