Foringi Vítisenglanna: Var á Íslandi fyrir tveimur vikum

Leiðtogi norsku Vítisenglanna, Leif Ivar Kristiansen, var hér á landi fyrir tveimur vikum síðan, í boði Fáfnis samkvæmt heimildum Vísis. Leif er einn alræmdasti Vítisengillinn í Noregi en hann hefur meðal annars verið ákærður fyrir stórfelldan fíkniefnainnflutning.

Dómsmálaráðuneytið hefur ákveðið að taka upp landamæraeftirlit vegna veislu sem Fáfnismenn ætla að halda á laugardaginn. Allir farþegar innan Schengen-svæðisins þurfa því að framvísa vegabréfi þegar þeir koma hingað til lands. Búist er við fjölda Vítisengla frá norðurlöndunum.

Þá segir í tilkynningu frá dómsmálaráðuneytinu að litið sé á veislu Vítisenglanna sem ógn við þjóðaröryggi og allsherjareglu.

Leif kom hingað til lands fyrir um tveimur vikum og tók sér margt fyrir hendur á meðan hann dvaldi hér á landi samkvæmt heimildum Vísis. Hann fór meðal annars gullna hringinn og skellti sér á snjóðsleða. Þá mun hafa sést til hans í World Class þar sem hann lyfti lóðum.

Á sama tíma og Leif var hér á landi stóð systurfélag englanna alræmdu í ströngu í Danmörku. Nokkur morð voru framin þar í landi. Þau voru sögð tengjast gengjabaráttu Vítisenglanna.

Leif hefur verið handtekinn fimm sinnum í heimalandi sínu. Þá sat hann í gæsluvarðhaldi fyrir að smygla 350 kílóum af hassi til Noregs frá Danmörku. Hann var dæmdur fyrir smyglið í héraðsdómi þar í landi, síðar var hann sýknaður í Hæstarétti.

Leif Ivar er talsmaður Fáfnis á meðan þeir eru svokallaðir áhangendur Vítisenglanna í Noregi. Til þess að vera fullgildur Vítisengill þarf fyrst að vera áhangandi.