Bomba á atkvæðaveiðum í Búlgaríu

Fyrirsætan, fegurðardrottningin og búlgarski landneminn, Ásdís Rán, heldur úti grimmum áróðri fyrir hönd íslenska framlagsins til Júróvisjón í Búlgaríu. Eins og allir sem fylgjast vel með Júróvisjón þá er það lífsnauðsynlegt að hafa Austur-Evrópu sín megin enda oft sem þær þjóðir bindast tryggðarböndum og koma sínum áleiðis. Mörgum til mikillar armæðu.

Á bloggi Ásdísar segir hún stolt: „[...] [É]g er dyggur stuðningsmaður náttúrulega búin að vinna að því að fá Búlgaríu til að kjósa stúlkuna svo ég nelgdi nokkur stig og stefni á enn fleiri í næstu kosningu! nokkuð viss um að þeir kjósi hana allir hérna."

Það er gott að allir leggi sitt á vogaskálarnar og því verður spennandi að fylgjast með í kvöld hvort ljóshærðan bomban hafi náð að sannfæra Búlgarana um ágæti Jóhönnu. Í það minnsta virðast þeir almennt nokkuð helteknir af þessari ljóshærðu fegurðardís frá kreppukotinu Íslandi.