Sagt upp fyrir að blogga óviðeigandi um mótmælendur

Guðmundi Jóhannssyni sveitarstjóra í Eyjafjarðarsveit hefur verið sagt upp störfum eftir átta mánaða starf. Umdeild bloggfærsla, samskiptaörðugleikar og hátternisvandamál Gumundar eru samkvæmt heimildum fréttastofu ástæður þess að sveitarstjórn vék Guðmundi frá störfum í gær.

Í bloggfærslu á gamlársdag, sem nú hefur verið eytt, þótti Guðmundur nota óviðeigandi orðbragð um mótmælendur á Hótel Borg þegar útsending Stöðvar 2 á Kryddsíldinni var rofin. Orðbragðið þótti ekki opinberum embættismanni sæmandi. Oddviti Eyjafjarðarsveitar og skrifstofustjóri munu í sameiningu fara með völd sveitarstjóra á næstunni. Óvíst er hvort Guðmundur á rétt á biðlaunum en hann fær greiddan 3ja mánaða uppsagnarfrest.