Loftbelgsfjölskyldan vildi í raunveruleikaþátt

Jim Alderen lögreglustjóri segir að að minnsta kosti einn fjölmiðill hafi greitt fjölskyldunni óþekkta upphæð fyrir tiltækið. Ekki er ljóst hvort greiðslan kom fyrir eða eftir hið meinta flug Falcons.

Það vakt heimsathygli fyrir helgi þegar lögreglan elti loftbelg sem heimilisfaðirinn smíðaði margra kílómetra leið eftir að foreldrarnir tilkynntu að Falcon hefði laumast þar um borð.

Í eftirförinni voru notaðir bílar, herþyrlur og jafnvel hestasveit lögreglunnar. Um tíma var flug stöðvað til og frá flugvellinum í Denver og flugvélum gert að breyta um stefnu.

Alderen lögreglustjóri segir að ákærur verði líklega lagðar fram á næstu dögum. Hann segir að synirnir þrír hafi allan tíman vitað að atburðurinn var sviðsettur. Þeir verði hinsvegar ekki ákærðir vegna ungs aldurs. Sá elsti er tíu ára gamall.

Heene hjónin eiga hinsvegar ekki von á góðu. Associated Press fréttastofan segir að alvarlegustu ákærurnar geti falið í sér sex ára fangelsi og hálfrar milljónar dollara sekt.

Auk þess mun barnaverndarnefnd taka til skoðunar hvort synirnir búi við viðunandi öryggi á heimili sínu.